लोकपाटी न्यूजकाठमाडौं। शहीद स्मारक ‘बी’ डिभिजन लिग फुटबल प्रतियोगिता अन्तर्गत नयाँबस्ती युथ क्लबले रामोञ्चक जित हात पारेको छ। सातदोबाटोस्थित एन्फा कम्प्लेक्समा शुक्रबार भएको पहिलो खेलमा सामाजिक युथ क्लबलाई २-१ गोल अन्तरले पराजित गर्दै नयाँबस्तीले रोमाञ्चक जित हात पारेको हो।
खेलको नवौं मिनेटमा सुरेश खत्रीको गोलबाट सामाजिकले अग्रता लिएको थियो। खेलको ५८ औं मिनेटमा नयाँबस्तीका रमेश तामाङले गोल गर्दै टिमलाई १-१ गोलको बराबरीमा ल्याए।
त्यसपछि, खेलको ७५ औं मिनेटमा जीवन मगरले गोल गर्दै नयाँबस्तीलाई २-१ को जित दिलाएका थिए। आजको जितसँगै नयाँबस्तीले ६ खेलबाट १० अंक जोडेको छ। त्यस्तै, आजको हारसँगै सामाजिकले ६ खेलबाट ४ अंक जोडेको छ।
लिगमा १४ क्लबले सिंगल राउण्ड रोबिन लिगको आधारमा प्रतिस्पर्धा गरिरहेका छन्। शीर्ष दुई टोली ‘ए’ लिगमा बढुवा हुने छन्। यस्तै पुछारका दुई टोली रेलिगेसनमा पर्ने छन्।
