लोकपाटी न्यूजएजेन्सी। युक्रेनका राष्ट्रपति भोलोदिमिर जेलेन्स्कीले रुससँगको शान्ति वार्ताका लागि ६ वटा शर्त अगाडि सारेका छन्। त्यसलाई युक्रेनको उच्च प्राथमिकता सूचीमा रहेका विषय भन्ने गरेको राष्ट्रपतिको कार्यालयले जनाएको छ।
बिहीबार राष्ट्रका नाममा सम्बोधन गर्दै उनले रुससँगको शान्ति वार्ताका बेला सम्बोधन हुनुपर्ने प्राथमिकताका विषयबारे बताएका हुन्। रुसले युद्धको अन्त्य गर्नुपर्ने कुरालाई युक्रेनले पहिलो शर्तका रूपमा राख्ने उनको भनाइ छ।
त्यसैगरी सुरक्षाको सुनिश्चितता, स्वाधीनता, क्षेत्रीय भौगोलिक अखण्डताको पुनः स्थापना, देशको वास्तविक सुनिश्चितता र वास्तविक रूपमै देशको संरक्षण हुनुपर्ने कुरालाई पनि उनले प्रमुख शर्तका रूपमा राखेका छन्। रुसले युक्रेनमा आक्रमण सुरु गरेको केही दिनपछि दुई पक्षका बीचमा वार्ता सुरु भएको थियो। पटक पटक भएको वार्ता परिणाममुखी हुन भने सकेको छैन।
पछिल्लो वार्ता गत सोमबार चौथो चरणमा भएको थियो। सो वार्ता भिडियोमार्फत भएको थियो। त्यसको दुई दिनपछि युक्रेनी राष्ट्रपतिका सल्लाहकार मिखाइलो पुडोल्याकले रुसी राष्ट्रपतिसँग यूक्रेनी राष्ट्रपतिले नै सिधै चाडै वार्ता गर्ने सम्भावना रहेको जानकारी दिएका थिए।
गत शुक्रबार रुसी राष्ट्रपतिको कार्यालय क्रेमलिनका प्रवक्ता दिमित्री पेस्कोभले रुसी र युक्रेनी राष्ट्रपतिबिचमा वार्ता सम्भव रहेको उल्लेख गरेका थियो। दुवै पक्षबाट राष्ट्रपति स्तरमा वार्ताको सम्भावना देखाइरहेका बेला यूक्रेनी राष्ट्रपति जेलेन्स्कीले छ शर्त अगाडि सारेका हुन्।
