लोकपाटी न्यूजकाठमाडौं । नेकपा माओवादी केन्द्रको राष्ट्रिय सम्मेलन पुष ११–१३ गतेसम्म काठमाडौंमा हुँदैछ । सम्मेलनको मिति नजिकिँदासम्म माओवादीले पार्टीको केन्द्रीय पदाधिकारी कति हुने भन्ने टुंगो भने लगाइसकेको छैन ।
राष्ट्रिय सम्मेलनले नै पदाधिकारीको टुंगो लगाउने माओवादी संसदीय दलका प्रमुख सचेतक तथा स्थायी कमिटी सदस्य देव गुरुङले जानकारी दिए । उनका अनुसार हाल विधानमा ५ सदस्यीय पदाधिकारीको व्यवस्था गरिएको छ । जसमा अध्यक्ष, उपाध्यक्ष, महासचिव, सचिव र कोषाध्यक्ष गरी ५ सदस्यीय पदाधिकारी रहने व्यवस्था छ।
स्थायी कमिटी सदस्य लिलामणि पोखरेलका अनुसार माओवादीकाे विधान संशोधनको तयारी भइरहेको छ । बहुपदमा जाने र पदाधिकारीको संख्या ११–१५ सदस्यीय हुन सक्ने उनले बताए ।
माओवादीले विधान संशोधन गरेर प्रदेशमा पनि ९ सदस्यीय पदाधिकारी बनाएको छ । जस अनुसार अध्यक्ष, तीन उपाध्यक्ष, सचिव, तीन उप–सचिव, एक कोषाध्यक्ष रहेका छन् । अब केन्द्रको पदाधिकारीको पनि विधान संशोधन गर्न लागेको उनले बताए।
तर केन्द्रमा कुन–कुन पद बनाइने भन्नेबारे टुंगाे लागिसकेकाे छैन । प्रदेशको व्यवस्थामा महासचिव थपिने र अरु पदमा पदाधिकारीको संख्या बढ्न सक्ने नेताहरु बताउँछन् ।
