लोकपाटी न्यूजकाठमाडौं। राष्ट्रिय वाणिज्य बैंक लिमिटेड संचालक समितिका अध्यक्ष धनिराम शर्माले नेपाल राष्ट्र बैंकका गभर्नर महाप्रसाद अधिकारी समक्ष शपथ लिएका छन् । अध्यक्ष शर्माले बैंक तथा वित्तीय संस्था सम्बन्धी ऐन, २०७३ को दफा १२७ को उपदफा १ वमोजिम बिहीबार पद तथा गोपनीयताको शपथ लिएका हुन् । बैंक संचालक समितिको बिहीबार बसेको बैठकले धनिराम शर्मालाई अध्यक्षमा चयन गरेको हो । अध्यक्ष धनिराम शर्मा नेपाल सरकार अर्थ मन्त्रालयका सह सचिव हुन् । शर्मा यस अघि नै नेपाल सरकार अर्थ मन्त्रालयबाट बैंकको संचालकको रुपमा नियुक्त भई कार्यरत थिए ।
शपथ ग्रहण कार्यक्रममा नेपाल राष्ट्र बैंकका डेपुटी गभर्नरद्वय चिन्तामणि शिवाकोटी र शिवराज श्रेष्ठ, अन्य उच्च पदाधिकारीहरु र राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठ लगायत अन्य कर्मचारीहरुको उपस्थिति रहेको थियो ।
अर्थमन्त्रालयका सहसचिवसमेत रहेका शर्मा अर्थबाट प्रतिनिधित्व गर्दै बैंकको सञ्चालक थिए ।
यसअघि गत भदौमा नै बैंकको अध्यक्ष बनाउनेगरी विवादस्पद छबि भएको उपप्रधानमन्त्री ईश्वर पोख्रेलका सम्धी उपेन्द्रकेशरी कोइरालालाई बैंकको अध्यक्ष बनाउने योजनाका साथ सञ्चालक नियुक्ति गरिएपछि चर्को विरोध भएको थियो । तर सार्वजनिक रुपमा नै कोइरालालाई बैंकको अध्यक्ष बनाउन नहुने भन्दै विरोध भए पनि त्यतिबेला बैंक सञ्चालक नियुक्त भए पनि अध्यक्ष बन्नबाट बन्चित बने । जसले गर्दा बैंक अध्यक्षविहीन थियो ।
त्यसको साढे चार महिनापछि उनी नभइ धनीराम शर्मा बैंकको अध्यक्ष चयन भएका छन् । बिहीबार बसेको सञ्चालक समितिको बैठकले शर्मालाई अध्यक्ष चयन गरेको बैंकका प्रमुख कार्यकारी अधिकृत किरणकुमार श्रेष्ठले बताए । उनले आजै राष्ट्र बैंकका गभर्नरसमक्ष पद तथा गोपनीयताको सपथ लिएर कार्यभार समेत ग्रहण गरिसकेका छन् । यसअघि पनि अध्यक्ष नरहेको अवस्थामा उनकै अध्यक्षतामा बैंक सञ्चालक समितिको बैठक बस्ने गरेको सीईओ श्रेष्ठले बताए ।
