लाेकपाटी न्यूजकाठमाडौं, ९ भदौ। नेपाल कम्युनिष्ट पार्टी (नेकपा) सचिवालय बैठकले पार्टी भित्रका नेता कार्यकर्ताका बारेमा सार्वजनिक टिका टिप्पणी नगर्न कडा निर्देशन दिएको छ।
नेता कार्यकर्ताका बारेमा केही भन्नुपरेमा तथ्यसंगत ढंगले पार्टीको आन्तरिक बैठकहरुमा राख्ने तर सार्वजनिक रुपमा टिकाटिप्पणी नगर्ने निर्णय बैठकले गरेको प्रवक्ता नारायणकाजी श्रेष्ठले जानकारी दिए। सार्वजनिक रुपमा नेताहरुको बारेमा टिका टिप्पणी गरेको पाईएमा स्पष्टीकरण लिँदै आवश्यक कारवाही गर्ने बैठकले निर्णय गरेको छ।
नेपाल कम्युनिष्ट पार्टी (नेकपा) ले कानूनमन्त्री भाुनभक्त ढकाललाई सुरक्षा विभाग प्रमूख र प्रदेश ३ का मुख्यमन्त्री डोरमणि पौडेललाई प्रादेशिक मामिला उपप्रमूखमा नियुक्त गरेको छ। पार्टी कार्यालय धुम्बराहीमा सोमबार बसेको पार्टीको सचिवालय बैठकले राष्ट्रिय सुरक्षा विभाग प्रमुखमा कानुन मन्त्री भानुभक्त ढकाललाई र उपप्रमुखमा रामकुमार राईलाई नियुक्त गरेको हो। यसअघि राईलाई खोटाङको सहइन्चार्जको जिम्मेवारी दिइएको थियो। सो जिम्मेवारीबाट हटाएर राईलाई राष्ट्रिय सुरक्षा विभाग उपप्रमूखको जिम्मेवारी दिइएको हो।
त्यसैगरी प्रादेशिक मामिला विभागको उपप्रमूखमा प्रदेश ३ का मुख्यमन्त्री डोरमणि पौडेललाई नियुक्त गरेको हो। त्यस्तै पत्रकार तथा लेखक विष्णु रिजाललाई विदेश विभागको उपप्रमूखको जिम्मेवारी दिईएको छ। बैठकले देवेन्द्र पराजुली, कल्पना धमला, पद्मा राई र किरण राईलाई केन्द्रीय सदस्यमा मनोनयन गरेको छ। पार्टी एकता प्रक्रियामा सामेल भएका मध्येबाट १० प्रतिशतसम्म केन्द्रीय समितिमा समावेश गर्न सकिने प्रावधानअनुसार सचिवालय बैठकले केन्द्रीय सदस्यमा मनोनयन गरेको हो। सचिवालय बैठकले विभिन्न जिल्ला, जनवर्गिय संगठन र विभागका उपप्रमूख र सहइञ्चार्जहरुको नियुक्त र जिम्मेवारी हेरफेर पनि गरेको प्रवक्ता नारायणकाजी श्रेष्ठले जानकारी दिए।
त्यसैगरी, कर्णाली प्रदेश सम्पर्क कमिटीको इञ्चार्जमा सत्या पहाडी, सुदुर पश्चिम प्रदेश सम्पर्क कमिटीको इञ्चार्जमा वीरमान चौधरीलाई नियुक्त गरिएको छ। चौधरीलाई यसअघि कैलालीको सहइञ्चार्जको जिम्मेवारी दिइएको थियो। बैठकले जनवर्गीय संगठनको सह-इञ्चार्जहरुमा पनि नयाँ व्यवस्था गरेको छ।
अखिल नेपाल महिला संघको सह-इञ्चार्जमा अमृता थापा र सिता पौडेललाई थप गरिएको छ। आदिवासी जनजाती महासंघ नेपाल र सम्बद्ध संगठनहरुको सह इञ्चार्जमा सुरेश आलेमगर र शेरबहादुर तामाङलाई थप गरिएको छ।
नेपाल दलित मुक्ति संगठन र सम्बद्ध संगठनहरुको सह- इञ्चार्जमा तिलक परियार र बोमबहादुर विश्वकर्मालाई , प्रेस संगठन नेपाल र सम्बद्ध संगठनहरुको सह-इञ्चार्जमा महेश्वर दाहाल, जनसांस्कृतिक महासंघ नेपाल र सम्बद्ध संगठनहरुको इन्चार्जमा केदार न्यौपाने, सह-इञ्चार्जमा खगेन्द्र राई, खेलकुद महासंघ र सम्बद्ध मोर्चाको इञ्चार्जमा जीवन घिमिरे र अजम्बर काङवाङलाई, इन्जिनियरिङ संगठनको सहइन्चार्जमा रामकुमारी झाँक्री र शिक्षक सम्बद्ध संगठनको सहइन्चार्जमा हिक्मत कार्कीलाई नियुक्त गरिएको छ।
त्यसैगरी ताप्लेजुङ जिल्ला सह-इञ्चार्जमा तिलकुमार मेन्याङबो, सुनसरी जिल्ला सहइन्चार्जमा भगवती चौधरी, सिरहा जिल्ला सहइञ्चार्जमा प्रमोद नारायण यादव र हरिनारायण चौधरी र चुँडामणि जंगलीलाई कास्की र दीपक देवकोटालाई कैलाली जिल्ला सहइन्चार्जको जिम्मेवारी दिइएको छ ।
त्यस्तैगरी, बैठकले सहकारी तथा गरिवी निवारण विभागको उपप्रमूखमा कमल चौलागाईलाई नियुक्त गरेको छ। यसअघि उपप्रमुखको जिम्मेवारी धर्मदत्त देवकोटालाई दिइएको थियो। बैठकले झलनाथ खनाल नेतृत्वको नीति अध्ययन प्रतिष्ठानको सहसंयोजकमा पूर्व राजदूत प्रमेश हमाललाई नियुक्त गरेको छ। नीति अनुसन्धान प्रतिष्ठानको सहसंयोजकको जिम्मेवारी रमेश धमलालाई दिइएको छ। धमलालाई ललितपुरको सहइञ्चार्जबाट हटाइएको छ।
