लाेकपाटी न्यूजकाठमाडाैं, २८ जेठ । लोक सेवाले स्थानीय तहका लागि खोलेको ९ हजार कर्मचारीको विज्ञापन रोक्ने संसदको राज्यव्यवस्था समितिविरुद्ध परीक्षार्थीहरु सडकमा ओर्लिएका छन्।
माइतीघरदेखि जुलुससहित नयाँबानेश्वर पुगेका उनीहरुले राज्य व्यवस्था समितिविरुद्ध र लोकसेवाको पक्षमा चर्का नाराबाजी गरे। जुलुसमा सहभागीहरुले लोकसेवाको परीक्षा रोक्न नहुनेमा जोड दिएका थिए ।
लोक सेवाको विज्ञापन रोक्ने पक्षमा उभिएका नेकपाका सांसद जनार्दन शर्माविरद्ध पनि चर्का नारा लगाए । लोक सेवाले जेठ १५ गते खुलाएको विज्ञापन राज्य व्यवस्था समितिले सोमबार रोक्न सरकार र लोकसेवालाई निर्देशन दिने निर्णय गरेको थियो।
संविधान विपरित भएको भन्दै राज्यव्यवस्था समितिले नौ हजार कर्मचारीको विज्ञापन रोक्न निर्देशन दिने निर्णय गरेपछि लोकसेवाको तयारी गरिरहेका युवाहरु आक्रोशित भएर सडकमा ओर्लिएका हुन्।
