लाेकपाटी न्यूजकाठमाडौं। प्रतिपक्षी दल कांग्रेसका प्रवक्ता विश्वप्रकाश शर्माले कांग्रेसले अर्को चुनाव जित्ने बताएका छन्। इतिहासमा एकपछि अर्को लगातार चुनाव नहारेको स्मरण गराउँदै उनले अबको चुनाव कांग्रेसले नहार्ने बताएका हुन्।
उनले कांग्रेस कहिल्यै जितेर मात्तिने र हारेर आत्तिने पार्टी नभएको बताए। पार्टीले सञ्चालन गरेको राष्ट्रिय जागरण अभियान अन्तरगत सोमबार नेपाल तरुण दल र नेपाल विद्यार्थी संघद्वारा आयोजित बृहत आम सभामा शर्माले सत्तामा रहेको सरकार, प्रतिपक्ष र जंगलमा रहेको विप्लव नबिग्रिए देशले शान्ति प्राप्त गर्ने उल्लेख गरे। विश्वमा स्वतन्त्रता दिवस नमनाउने नेपाल कसैको दास नभएको उनले बताए।
शर्माले प्रेस स्वतन्त्रता कोही व्यक्ति वा दलको कृपाले प्राप्त नभएको बताए। पत्रकारको कलम बन्द भए सरकार निरंकुश र अधिनायकवादी हुने उल्लेख गर्दै मिडिया काउन्सिल बिधेयक ल्याएर पत्रकारको टाउकोमा तरबार नझुण्ड्याउन उनले सरकारलाई आग्रह गरे। उनले सरकारले यो निर्णय नसच्याए प्रेस स्वतन्त्रता र देशका कैयौं परिवर्तनका निम्ति बलिदानी दिने पत्रकारको अपमान हुने बताए।
कांग्रेस गुल्मीले राष्ट्रिय जागरण अभियान अन्तर्गत पहिलो चरण सम्पन्न गरेको जिल्ला सभापति भुवन प्रसाद श्रेष्ठले बता । उनले आफ्ना संघसंगठनहरु मार्फत सबै स्थानीय तहमा फरकफरक विषयका कार्यक्रम गरिएको बताए। उनले यो अभियानले कांग्रेस कार्यकर्तामा नयाँ उत्साह थपेको उल्लेख गर्दै अब कांग्रेस आम नेपालीबाट टाढा रहन नसक्ने बताए।
