लाेकपाटी न्यूजकाठमाडौं, २३ वैशाख। निजी क्षेत्रको दूरसञ्चार कम्पनी एनसेलको ८० प्रतिशत सेयर खरिद–बिक्रीको लाभकर छलि विवादमा परेको मुद्दाको सुनुवाइ लम्बिएको छ।
सोमबार सर्वोच्च अदालतले ठूला करदाता कार्यालयले निर्धारण गरेको कर आफूले तिर्नुपर्ने भन्दा बढी भएको भन्दै एनसेलले दायर गरेको रिटको सुनुवाइ ‘हेर्दाहेर्दै’मा राखेको हो। न्यायाधीश सपना मल्ल प्रधान र प्रकाशकुमार ढुंगानाको इजलासमा बहस नसकिएपछि सुनुवाइ लम्बिएको छ। उक्त रिटबारे मंगलबार यी दुई न्यायाधीशकै इजलासमा सुनुवाइ हुनेछ।
एनसेलले दायर गरेको रिट निवेदनमा १२ बैशाखमा न्यायाधीश बमकुमार श्रेष्ठको एकल इजलासले अल्पकालीन अन्तरिम आदेश जारी गर्दै सोममबारका लागि छलफलमा बोलाएको थियो। यसअघि ठूला करदाता कार्यालयले वैशाख ३ मा एनसेललाई ३९ अर्ब रुपैयाँ कर निर्धारण गर्दै एक साताभित्र तिर्न पत्राचार गरेको थियो।
