लाेकपाटी न्यूज
काठमाडौं, २३ फागुन । काठमाडौं उपत्यकामा हुने गरेको ट्राफिक जामलाई कसरी व्यवस्थित गर्न सकिन्छ भनेर जापानले अध्ययन शुरु गरेको छ । राजधानीको त्रिपुरेश्वर, बानेश्वर र कोटेश्वरमा अत्याधिक जाम पर्ने भएकोले सो जाम कसरी हटाउन सकिन्छ भन्नेबारे जापानले अध्ययन थालेको हो ।
एक महिना नेपाल आएको जापानी टोलीले यी तीन ठाउँमा जाम हटाउन फ्लाई ओभर र अण्डरपास बनाउने विषयमा अध्ययन गरिरहेको बताइएको छ ।
त्यसमध्ये त्रिपुरेश्वरमा भने अन्डर पासभन्दा फ्लाइओभर उत्तम विकल्प भएको जापानी अध्ययनले देखाएको छ ।
‘त्रिपुरेश्वरमा अन्डरपास बनाउन सकिन्न, फ्लाइओभर नै बनाउनु पर्छ । बानेश्वर र कोटेश्वरमा के बनाउँदा सहज र सस्तो हुन्छ भन्नेमा उहाँहरू अध्ययन गरिरहनु भएको छ, ’ सडक विभागको विकास सहायता समन्वय महाशाखाका प्रमुख केशव शर्माले भने, ‘अध्ययन लगभग सकिएको छ । उहाँहरू रिपोर्ट बनाउने क्रममा हुनुहुन्छ ।’
यो सम्भाव्यता अध्ययनको खर्च जापान सरकार आफैंले व्यहोरेको जनाइएको छ ।
जापानी अध्ययन टोलीले त्रिपुरेश्वर, बानेश्वर र कोटेश्वरमा नयाँ संरचना बनाउन लाग्ने पैसाको बारेमा अर्थ मन्त्रालयसँग पनि प्रारम्भिक छलफल गरिरहेको छ ।
जापानी अधिकारीहरूले तीन ठाउँमा बनाउने संरचनाको सामान्य स्केच लिएर मन्त्रालयसँग छलफल गरेका थिए ।
सम्भाव्यता अध्ययनको अन्तिम प्रतिवेदन आएपछि विस्तृत परियोजना अध्ययन हुने बताइएको छ । त्यसपछि नयाँ संरचना बनाउन लाग्ने मूल्य निर्धारण हुनेछ ।
‘यी परियोजनाहरूको विस्तृत अध्ययन आएपछि लगानी कति हुने र कुन मोडलमा जापानले लगानी गर्ने भन्ने टुंगो लाग्छ,’ शर्माले भने ।
सरकारले चालु आर्थिक वर्षको बजेटमै कोटेश्वरलगायत देशभरका ६ ठाउँमा सुरूङको डिपिआर बनाउने लक्ष्य राखेको छ ।
