लाेकपाटी न्यूजसुर्खेत, ६ माघ । वैदेशिक रोजगारीमा जानेहरुका लागि कर्णालीबाटै श्रम स्वीकृति प्रदान गरिने भएको छ । अब कर्णालीवासीले श्रम स्वीकृतिका लागि हजारौं रुपैयाँ खर्चेर काठमाडौं आउनुपर्ने बाध्यता अन्त्य भएको छ।
आइतबारदेखि सरकारले कर्णाली प्रदेशको राजधानी सुर्खेतबाट पनिश्रम स्वीकृतिलगायत सेवा प्रदान गर्ने भएको हो ।
श्रम, रोजगार तथा सामजिक सुरक्षा मन्त्रालयले कर्णाली प्रदेशको श्रम तथा रोजगार कार्यालयबाट पुनःश्रम स्वीकृतिको सेवा प्रदान गरिने बताएको छ ।
श्रम कार्यालयबाट प्रारम्भिक चरणमा पुनःश्रम स्वीकृति प्रदान गर्ने, वैदेशिक रोजगारीसम्बन्धी इजाजत पाएका संस्था र तालिम एवं अभिमुखीकरण संस्थाको अनुगमन तथा नियमन गरिनेछ ।
सरोकारवालाबीच वैदेशिक रोजगारीको सूचना तथा जानकारी सम्प्रेषण गर्ने एवं गुनासो सुनुवाइ गरी सेवा प्रवाहलाई सहजीकरण गर्नेलगायत कामकारबाही कार्यालयबाटै सम्पादन हुने श्रम, रोजगार तथा सामाजिक सुरक्षामन्त्री गोकर्ण विष्टका प्रेस संयोजक मदन खनालले जानकारी दिएका छन्।
श्रम, रोजगार तथा सामाजिक सुरक्षामन्त्री गोकर्ण विष्टले मन्त्रालयको जिम्मेवारी सम्हालेलगत्तै वैदेशिक रोजगारीसँग सम्बन्धित सेवालाई विकेन्द्रित गर्ने घोषणा गरेका थिए। त्यसलगत्तै सरकारले वैदेशिक रोजगारीमा जाने कामदारको सहजताका लागि प्रदेशबाटै पुनः श्रम स्वीकति प्रदान गर्ने निर्णय गरेको हो।
