लाेकपाटी न्यूजकाठमाडाैं । बिहीबार राति बाराको एक बैंकमा लुट्न गएका लुटेरालाई पक्राउ गर्ने बैंकका सूरक्षा गार्डलाई प्रहरीले सम्मान गरेको छ।
रातको १२ बजे कलैया उपमहानगर ४ मा रहेको एनसीसी बैंक शाखा कार्यालयमा लुट्न गएका एक युवालाई बैंकका सूरक्षा गार्ड तथा पूर्व प्रहरी हवल्दार साहेव प्रसाद यादवले पक्राउ गरेका थिए ।
लुट्न जाने व्यक्ति १७ वर्षका युवा भएको बताइएको छ। तर प्रहरीले ती युवाकाे नाम भने खुलाएको छैन। उनले बैंकको छतबाट कम्पाउन्डमा छिरी मूलढोकाको ताल्चा काटी भित्र प्रवेश गरेर सीसीटीभी तथा बिजुली लाइन काटेर चोरीको तयारी गरेका थिए। तर सूरक्षा गार्ड यादवले तत्कालै पक्राउ गर्न सफल भएका थिए।
यादवको कार्यको प्रशंसा गर्दै जिल्ला प्रहरी कार्यालय बाराका प्रहरी उपरीक्षक सानुराम भट्टराईले नगद ५ हजारसहित पुरस्कृत गरेका हुन्। अभियुक्तलाई चोरी उद्योग मुद्दामा जिल्ला अदालतबाट म्याद थप गरी अनुसन्धान भइरहेको प्रहरीले जनाएको छ।
