लोकपाटी न्यूजपाल्पा। नेपाल उद्योग वाणिज्य महासंघका अध्यक्ष चन्द्रप्रसाद ढकालले पाल्पाली ढाका उद्योगलाई आधुनिकीकरण गरी धेरै मात्रामा उत्पादन गर्न सकिए अन्तर्राष्ट्रिय बजारमा पनि निर्यातमार्फत ब्रान्डिङ गर्न सकिने बताएका छन्।
पाल्पा उद्योग वाणिज्य संघको ७० औँ वार्षिक साधारण सभाको आज उद्घाटन गर्दै अध्यक्ष ढकालले नेपालको निर्यात बजारलाई प्रवर्द्धन गर्न सकिने नेपालका यस्ता कैयौँ मौलिक उत्पादनहरू भए पनि तिनको बजारीकरणमा राज्य पछि परेको धारणा राखेका हुन्।
उनले भने, ‘पाल्पाले बेच्न सक्ने त पर्यटन हो तर पनि पाल्पाको ढाका र करुवाले राष्ट्रिय पहिचान नै बनाएकाले यी उत्पादनको ब्रान्डिङ र बजारीकरणमा के गर्न सकिन्छ यहाँका व्यवसायीहरू योजना बनाएर आउनुस्, हामी के गर्न सक्छौं, गर्छौं।’
अध्यक्ष ढकालले अहिले बैंकको ब्याज पनि सस्तो भएको र देशमा लगानीको वातावरण पनि सहज बन्दै गएको अवस्थामा यस्ता राष्ट्रिय पहिचान बनाइसकेका उत्पादनमा लगानी गरी मुनाफा लिने कामबाट पछि पर्न नहुने पनि बताए। उनले पाल्पा पर्यटनमा पनि देशको एक प्रख्यात ठाउँ भएकाले पर्यटकीय पूर्वाधारको निर्माण गरी स्वदेश र विदेशका बढी भन्दा बढी पर्यटक भित्र्याउने काममा लाग्नुपर्ने पनि बताए।
उनले भने, ‘पाल्पामा रहेको रानीमहल एक ऐतिहासिक सम्पदा हो र योसँग नेपालको एक शताब्दी भन्दा लामो इतिहास छ। यसको विकास गरेर पर्यटक आकर्षण गर्न सक्ने सम्भावनाको खोजी गर्नुपर्छ। यी सम्पदाहरूको संरक्षण, प्रवर्द्धन र प्रचारप्रसारबाट पर्यटकीय क्रियाकलापहरूमा बढवा दिन सक्नुपर्छ।’
आफू सानो छँदा पनि बागलुङका नागरिकहरू स्वास्थ्य उपचारदेखि स्थानीय बजारसम्मका लागि पाल्पा आउने गरेको आफूलाई थाहा भएको प्रसङ्ग उल्लेख गर्दै पाल्पासँग आफ्नो पनि भावनात्मक सम्बन्ध रहेको बताए। सोही अनुसार अहिलेको पाल्पाले पनि बजार होस् या अन्य काममा पनि अगुवा भई अघि बढ्न सक्ने उनको भनाई थियो।
