लाेकपाटी न्यूजकाठमाडौं, १७ वैशाख। नेपालमा जंगली हात्तीको आक्रमणबाट १ सय ३७ जनाले ज्यान गुमाएका छन्। पछिल्लो १५ वर्षमा नेपालमा जंगली हात्तीको आक्रमणबाट १ सय ३७ जनाले ज्यान गुमाएको तथ्यांक सार्वजनिक भएको छ।
जंगली हात्ती संरक्षणका लागि निर्माण गर्न लागिएको कार्ययोजनाको सुझाव संकलन गर्न चितवनको सौराहामा आयोजित छलफलमा जंगली हात्तीको आक्रमणबाट १ सय ३७ जनाको ज्यान गएको तथ्यांक सार्वजनिक गरिएको छ। जंगली हात्तीको आंतक सबैभन्दा बढी बर्दियामा भएको छ।
बर्दियामा १५ वर्षको अवधिमा ३५ जनाले ज्यान गुमाएको पर्सा राष्ट्रिय निकुञ्जका सहायक संरक्षण अधिकृत अशोक रामले जानकारी दिए। त्यस्तै झापामा २८ जनाले ज्यान गुमाउँदा चितवनमा ११ जनाले जंगली हात्तीको आक्रमणमा ज्यान गुमाएका छन्।
सप्तरी र सिरहामा पनि ११–११ जनाको मृत्यु भएको तथ्यांक रहेको छ। नेपालमा हात्ती संरक्षणसम्बन्धी नयाँ कार्ययोजना निर्माण गर्न चितवनमा कार्यशाला गोष्ठी गरी सल्लाह सुझाव संकलन गरिएको हो।
उनीहरुले मानव र हात्तीबीचको द्वन्द्व न्यूनीकरण गर्न सहज र सरल रुपमा क्षतिपूर्ति दिने पद्धतीको विकास गर्नुपर्नेमा जोड दिएका थिए। नेपाल सरकारले हात्ती संरक्षणका लागि पाँच वर्षे कार्ययोजना निर्माण गर्न सरोकारवाला पक्षसँग राय सुझाव संकलन गर्न सुरु गरेको हो।
