लाेकपाटी न्यूज
पोखरा । गण्डकी प्रदेशका मुख्यमन्त्री पृथ्वीसुब्बा गुरुङले आधुनिक प्रविधिसंग नजोडिए मुलुकको विकास सम्भव नभएको बताएका छन् ।
बुधबार मदन भण्डारी फाउन्डेसन जिल्ला कार्य समिति कास्कीले पोखरामा आयोजना गरेको ‘गण्डकी प्रदेशको समेद्धिका आधार’ विषयक प्राज्ञिक बहस कार्यक्रममा बोल्दै उनले यस्तो बताएका हुन् ।
मुलुकका कतिपय ठाउँहरु अझै पनि आधुनिक प्रविधिसंग नजोडिएको भन्दै उनले त्यस्ता स्थानहरुलाई सरकारले नै प्रविधिमैत्री बनाउनमा पहल सुरु गर्नुपर्ने उनको भनाई रहेको थियो ।
राष्ट्रिय गौरवका आयोजनाहरुमा सरकारले अझै पनि २५ प्रतिशत रकम काम खर्च गरेको उनले कार्यक्रममा बताए । राष्ट्रिय गौरव बाहेक अन्य विकासका कामहरुमा समेत बजेट खर्च नहुनु अहिले नेपालका लागि निकै ठूलो चुनौती र विकासको बाधक रहेको मुख्यमन्त्री गुरुङको भनाइ रहेको थियो ।
गण्डकी प्रदेशले स्रोत तथा साधन पर्याप्त हुँदा समेत सोचे जस्तो विकासका कामहरु गर्न नसकेको भन्दै उनले प्रदेश सरकारले काम गर्न नसेकेको स्वीकार गरेका छन् । काम गर्न नसक्नुमा केही अवरोध तथा समस्याहरु रहेको र त्यसको समाधान गर्दै विकास निमार्णका कामहरुलाई अगाडि बढाइने उनले बताएका छन् ।
प्रदेशको विकासका लागि लगानीमैत्री वातावरण मुख्य कुरा भएको उनको भनाई रहेको थियो । गण्डकी प्रदेशलाई समृद्धि तथा विकासतर्फ अगाडि बढाउनका लागि उद्यमशिलता लाग्ने वातावरण समेत तयार पार्नुपर्ने बताउँदै मुख्यमन्त्री गुरुङले त्यसपछि मात्र रोजगारका ढोकाहरु पनि खुल्ने बताए।
