लोकपाटी न्यूजकाठमाडौं। जनता समाजवादी पार्टीका संघीय परिषद् अध्यक्ष डा. बाबुराम भट्टराई स्थानीय चुनाव केन्द्रित दलहरूको गतिविधिप्रति असन्तुष्टि जनाएका छन्। डा. भट्टराईले शुक्रबार सामाजिक सञ्जालमार्फत दलहरू स्थानीय चुनावको गणित मिलाउने र भीड प्रदर्शनको होडबाजी केन्द्रित रहेको भन्दै असन्तुष्टि जनाएका हुन्।
यस्तो अवस्थामा जनताका मुद्दा पुरै हराउने जोखिम देखिएको उनले बताए। मुलुकको राजनीति अब अंकगणित र द्रव्यमै सीमित रहेको उल्लेख गर्दै डा. भट्टराईले दलहरू नागरिकका मुद्दा संवेदनशील नभएको बताए। चुनावमार्फत फेरि पुरानै सोच, आचार र अनुहार दोहोरिए त्यसले नयाँ परिणाम दिन नसक्ने उनको भनाई छ।
डा. भट्टराईले लेखेका छन्, ‘बिहा गर्ने हतपतमा केटी र केटा माग्नै बिर्स्यो भनेझैँ स्थानीय चुनावको गणित मिलाउने र भीड प्रदर्शन गर्ने होडमा देश र जनताका मुद्दा पुरै हराउने जोखिम पो देखिँदै छ त! राजनीति अब अंकगणित र द्रव्यमै सीमित रहने हो ? उही पुराना सोच, आचार र अनुहार दोहोरिएर के फरक परिणाम आउला? हामी कता जाँदै छौं ?’
