लोकपाटी न्यूजकाठमाडौं। नेपाली काँग्रेसका नेता गगन थापाले आफ्ना वरिष्ठ नेता रामचन्द्र पौडेलको गिरफ्तारीप्रति आपत्ति जनाएका छन्। तनहुँको व्यास नगरपालिकाका दुई वडा जोड्ने पुलको उद्घाटनका लागि पुगेका पौडेललाई बुधवार दिउँसो प्रहरीले गिरफ्तार गरेको थियो।
पौडेललाई करिब तीन घण्टा जिल्ला प्रहरी कार्यालयको हिरासतमा राखिएको थियो। पुल उद्घाटन गर्ने क्रममा सत्तारुढ नेकपा र काँग्रेस कार्यकर्ताबीच तनाव भएपछि स्थानीय प्रशासनले त्यस क्षेत्रमा निषेधाज्ञा जारी गरेको थियो। नेपाली काँग्रेसका नेता कार्यकर्ता देखी सामाजिक सञ्जालका कतिपय प्रयोगकर्ताले समेत पौडेलको धरपकडको घटना चर्को आलोचना गरिरहेका छन्।
सोही क्रममा सामाजिक सञ्जालमार्फत नेता थापाले पनि आफ्ना पौडेलको गिरफ्तारी र प्रहरी हस्तक्षेप राजनीतिक प्रतिशोध र शक्ति उन्माद भएको टिप्पणी गरेका हुन्। यस घटनाले सरकारको चरित्र उदांग भएको उनले बताएका छन्। उनले आफ्ना पौडेलको गिरफ्तारी प्रधानमन्त्री केपी शर्मा ओलीका लागि निकै महँगो पर्ने चेतावनी दिए।
सामाजिक सञ्जालमा उनले भनेका छन्, ‘नेका वरिष्ठ नेता रामचन्द्र पौडेलको गिरफ्तारी र प्रहरी हस्तक्षेप स्थानीय प्रशासनको एकल निर्णय र परिस्थितिजन्य प्रतिक्रिया हुनै सक्दैन, होइन। यो नियोजित हो,राजनीतिक प्रतिशोध हो, शक्ति उन्माद हो। यसले यो सरकारको चरित्रलाई उदाङ्गो बनाएको छ। केपी शर्मा ओली ज्यू यो तपाईँका लागि निकै महँगो पर्नेछ।’
