लोकपाटी न्यूजधनगढी। बैतडीमा बलात्कार घटनामा वडा अध्यक्ष पक्राउ परेका छन्। सिगास गाउँपालिका ३ की १८ वर्षीया युवतिमाथि भएको बलात्कार घटनामा वडा अध्यक्ष पक्राउ परेका हुन्।
जिल्ला प्रहरी कार्यालयका प्रमुख प्रहरी नायव उपरीक्षक नारायणप्रसाद अधिकारीका अनुसार सिगास गाउँपालिका ३ का वडा अध्यक्ष शेरसिंह साउँदसहित थप चारजना पक्राउ परेका छन्। सोही ठाउँका राजेन्द्र धामी, नरेन्द्र धामी र गोपाल धामीलाई पनि शनिबार बेलुका पक्राउ गरिएको प्रहरी नायव उपरीक्षक अधिकारीले जानकारी दिए।
योसँगै किशोरी बलात्कार प्रकरणमा ६ जना पक्राउ परिसकेका छन्। यसअघि गएको बिहीबार सोही घटनामा संलग्न रहेको आरोपमा प्रहरीले मनोजसिंह धामी र अमर धामीलाई नियन्त्रण लिएको थियो। उनीहरुमाथि अदालतबाट म्याद थपेर अनुसन्धान भइरहेको प्रहरी नायव उपरीक्षक अधिकारीले बताए।
बलात्कार घटनाका मुख्य आरोपित सिगास ३ का दीपकसिंह धामी भने फरार रहेका प्रहरीले जनाएको छ। सिगास गाउँपालिका ३ की १८ वर्षीया युवतिमाथि गत जेठमा बलात्कार भएको र गत असार १४ गते गाउँमै तमसुक बनाएर सो घटना मिलाउन खोजिएको थियो। तमसुकमा पीडित पक्षलाई कात्तिक मसान्तभित्र एकतोला सुन दिने भनिएको थियो। पीडित पक्षलाई सुन नदिएपछि बलात्कारको घटना बाहिर आएको हो।
