लोकपाटी न्यूजनिर्मल पौडेल, पर्वत। विश्वभरि महामारीको रुपमा फैलिरहेको नोवेल कोरोना भाइरस (कोभिड १९) को आशंकामा गण्डकी प्रदेशमा अहिलेसम्म १ सय ८० जनाको नमुना संकलन गरिएको छ। जसमा १ सय ३० जनाको नेगेटिभ २ जनाको पोजेटिभ र ४८ जनाको नतिजा आउन बाँकी रहेको छ।
प्रदेशका ११ जिल्लामध्ये राजधानी पोखराको परीक्षण कक्षमा नमुना संकलन गरिएकोमा कास्कीमा अहिलेसम्म ८४ जनाको परीक्षण गरिएको छ भने पर्वतमा कुल ३२ जनाको संकलन गरिएको छ। कास्कीमा ८४ जनाको नमुना संकलन गरिएकोमा ६६ जनाको नेगेटिभ आएको छ भने १८ जनाको नतिजा आउन वाँकी रहेको छ।
पर्वतमा ३२ जनामा २३ जनाको नेगेटिभ आएको छ भने फलेवासका ९ जनाको रिपोर्ट आउन बाँकी छ। यसैगरी बाग्लुङमा १८ जनाको नमुना परीक्षण गरिएको छ, जसमा २ जनाको रिपोर्ट पोजेटिभ आएको छ भने १६ जनाको रिपोर्ट नेगेटिभ आएको छ। उनीहरुको उपचार धौलागिरी अञ्चल अस्पतालमा उपचार गरिएको छ।
लम्जुङमा संकलन गरिएका ११, म्याग्दीमा ३, गोरखामा २ वटा नमुना संकलन गरिएको छ। यस्तै मुस्ताङ, मनाङ, नवलपुर र तनहुँमा कसैको पनि संकलन गर्न पर्ने स्थिति आएकै छैन। अहिलेसम्म गण्डकी प्रदेशमा नमुना संकलन गरिएकामध्ये १ सय ३० जनाको नेगेटिभ रिपोर्ट आएको छ भने पोखरा पठाइएका ४८ वटाको रिपोर्ट आउन बाँकी रहेको प्रदेश नम्वर ४ को कोरोना विशेष स्वास्थ्य तथ्याङ्कले देखाएको छ।
यसरी हेर्दा नमुना संकलनमा कास्कीपछि पर्वत दोस्रो स्थानमा आएको छ। पर्वतमा रहेका स्वास्थ्यकर्मीको उच्च मेहेनतको कारण पर्वत जिल्ला कोरोना भाइरसको नमुना संकलनमा दोस्रोमा पर्दछ।
