लोकपाटी न्यूजकाठमाडौं, १२ चैत। कोरोना भाइसरबाट सुरक्षित हुनका लागि सरकारले गरेको लकडाउन अवज्ञा गर्दै हिड्ने र सवारी साधनलाई मकवानपुर प्रहरीले नियन्त्रणमा लिएको छ । पहिलो दिन सामान्य रुपमा सम्झाउँदै छोडिए पनि प्रहरीले दोश्रो दिनबाट नियन्त्रणमा लिन सुरु गरेको हो।
अहिलेसम्म १४ जनालाई नियन्त्रणमा लिइएको जिल्ला प्रहरी कार्यालय मकवानपुरले जानकारी दिएको छ । अटेर गरी हिड्ने सवारी र मानिस दुवैलाई नियन्त्रणमा लिइएको प्रहरीले बताएको छ। प्रहरीले अहिलेसम्म लकडाउन उल्लंघन गर्ने ८३ वटा मोटरसाइकल, एउटा सुमो, ४ वटा अटो नियन्त्रणमा लिइएको छ।
बिहानको समयमा संक्रमणबाट बच्नका लागि सम्झाए पनि दिउँसोको समयमा अटेर गरी हिँडेकालाई नियन्त्रणमा लिइएको प्रहरीले जनाएको छ।
मंगलबारको लकडाउनमा मकवानपुरका प्रमुख जिल्ला अधिकारी दिपकराज नेपाल र प्रहरी प्रमुख सुशिलसिंह राठोरले लकडाउन पूर्ण कर्फ्यु नभएकाले समाउने र थुन्ने नीति नभएकोे बताएका थिए । संक्रमणबाट सुरक्षित रहनका लागि सहजीकरण गर्ने तर नियन्त्रणमा लिने कुनै निर्देशन नरहेकोे बताए पनि बुधबारबाट अटेर गर्नेलाई नियन्त्रणमा लिन थालिएको छ।
