लाेकपाटी न्यूजकाठमाडौं। अमेरिकी राष्ट्रपति डोनाल्ड ट्रम्पविरुद्धको महाभियोग पक्षपातपूर्ण आक्रोश भएको रिपब्लिकन पार्टीका नेताहरुले बताएका छन्। सिनेटको रिपब्लिकन तर्फका नेता मिच मक्कनेलले यो इतिहासकै सबैभन्दा हतारमा गरिएको अनुचित कदम भएको टिप्पणी गरेका छन्।
डेमोक्र्याटले नेतृत्व गरेको तल्लो सदन प्रतिनिधि सभाले पक्षपातपूर्ण आक्रोश पोख्दा त्यसले भविष्यका लागि एक विषाक्त नजिर बसाउने उनले बताए। तर डेमोक्र्याटस्का नेता चक शुमरले भने मक्कनेलले राष्ट्रपतिका कदमको बचाउमा केही नबोलेको बताएको बीबीसीले उल्लेख गरेको छ।
आफ्नो भाषणमा मिच मक्कनेलले १२ साता लामो अनुसन्धानले अमेरिकी प्रजातन्त्रका संस्थाहरूमाथि क्षति पु¥याउनसक्ने चेतावनी दिए। उनले ट्रम्पले कुनै कानून तोडेका छन् भन्ने पुष्टि गर्न पनि सदन विफल भएको बताए। बुधवार अमेरिकी संसद्को तल्लो सदनले ट्रम्पमाथि लागेका दुवै वटा आरोपमा उनलाई महाअभियोग लगाउने पक्षमा बहुमत दिएको थियो।
राष्ट्रपतिले आफ्नो शक्तिको दुरुपयोग गरेको र सन् २०२० मा हुने मतदानमा पुनः निर्वाचित हुने सम्भावना बलियो बनाउनका लागि युक्रेनसँग अनुचित तरिकाले सहायता मागेको उनीमाथि आरोप लागेको थियो। ट्रम्पले अब त्यसबारेको सुनुवाइको सामना माथिल्लो सदनमा गर्नुपर्नेछ।
सिनेटमा रिपब्लिकनहरूको बाहुल्यता रहेकाले उनलाई शक्तिबाट हटाइने सम्भावना भने छैन। तल्लो सदनका करिव सबै डेमोक्र्याटले अभियोगको पक्षमा मतदान गरेका थिए भने रिपब्लिकनले त्यसको विपक्षमा मत दिएका थिए। अमेरिकी इतिहासमा सिनेटमा सुनुवाइको सामना गर्नुपर्ने ट्रम्प तेस्रो राष्ट्रपति भएका छन्।
उनले महाभियोग प्रक्रियालाई ‘छल’ भनेका छन्। सिनेटमा हुने सुनुवाइमा ह्वाइट हाउसका ५३ वर्षीय रिपब्लिकन वकिल प्याट सिपोलोनीले आफ्नो प्रतिनिधित्व गर्ने सम्भावना रहेको ट्रम्पले बताए।
