लाेकपाटी न्यूजकाठमाडाैं, १४ असाेज। चिनियाँ राष्ट्रपति सी जिनपिङले जनवादी गणतन्त्र चीन स्थापना भएको ७० औँ वार्षिकीको अवसरमा मंगलबार सम्पन्न भएको भव्य र्याली अघि सम्बोधन गरेका छन् । ७० वर्षअघि चीनमा कम्युनिष्ट शासन स्थापना भएको थियो ।
र्यालीकाे सम्बोधन गर्दै उनले एकता, विकास र सामर्थ्यलाई जोड दिनुपर्ने बताए। सीले भने, ‘यो महान् राष्ट्रको जग हल्लाउन सक्ने कुनै शक्ति छैन ।’ सन् १९४९ अक्टोबर १ मा माओले जन–गणतन्त्र चीनको घोषणा गरेको तियानमेन चोकमा उभिएर उनले भने, ‘आज एउटा समाजवादी चीन विश्व सामु खडा उभिएको छ ।कुनै शक्तिले पनि चिनियाँ नागरिक र चिनियाँ राष्ट्रलाई अघि बढ्नबाट रोक्न सक्दैन।’
सीले सम्बोधनको क्रममा चिनियाँ कम्युनिष्ट पार्टीले लामो समयदेखि प्रयोग गर्दै आएको राष्ट्रवादी भाषा प्रयोग गरेका थिए । चिनियाँ कम्युनिष्ट पार्टीले लामो समयदेखि कयैन् औपनिवेशिक शक्तिको चौतर्फी आक्रमण भोग्दै आएको चीनलाई ‘अपमानको शताब्दी’बाट माथि उठाउन बताउँदै आएको छ । सीको सम्बोधनमा यही भाषाको प्रतिध्वनि सुनिएको थिए ।
सम्बोधनमा सीले हङकङको कुरा पनि उठाएका छन् । तीन महिनादेखि सरकारविरोधी प्रदर्शन सामना गरिरहेको हङकङबारे सीले भने, ‘चीन एक देश, दुई प्रणालीलाई शान्तिपूर्ण रुपमा लागू गर्ने कुरामा प्रतिबद्ध हुनुपर्छ ।’
चीनको जनवादी गणतन्त्रको विरोधमा हङकङमा मंगलबार पनि छिटपुट प्रदर्शन गरिएको छ । ‘हामी हङकङ र मकाओको दीर्घकालिन स्थीरता, अन्तरतटीय सम्बन्धमा विकास र सम्पूर्ण देशका पूर्ण एकिकरण गर्ने कुरामा प्रतिवद्ध छौँ,’ सीले भने ।
च्याङ–यान एभेन्यूमा सैन्य फौजको परेड अवलोकन गरिसकेपछि सीले विशाल सैन्य परेडको अध्यक्षता गरेका थिए । त्यस क्रममा विश्वकै अत्याधुनिक हातहतियार प्रदर्शन गरिएका थिए ।
र्यालीको तयारी गर्नेहरुले त्यसमा झण्डै १५ हजार सेना, १६० वायुयान र ५८० हातहतियार प्रयोग हुने बताएका थिए । प्रदर्शनमा देखाइने हातहतियारमा विश्वमै उत्कृष्ट मानिने ड्रोन प्रविधि र अत्याधनिक मिसाइल प्रणाली पनि थियो ।
बेइजिङको आकासमाथि हेलिकप्टरले देशको राष्ट्रिय झण्डा उडाएका थिए पछि वायुयानले ‘७०’ अंक बनाएर उडेका थिए । ७० औँ वार्षिकोत्सवका अवसरमा बेइजिङका नागरिकमाझ उत्साह देखिएको थियो । –एजेन्सी
