लाेकपाटी न्यूजकाठमाडौं। सत्तारुढ दल नेपाल कम्युनिस्ट पार्टी (नेकपा)का नेता हरिराज अधिकारी ‘कुमार’ले नेकपा जनताकाे बहुदलीय जनवादकाे ह्याङबाट मुक्त हुनुपर्ने बताएका छन्।
उनले पूर्वसहमतिका आधारमा पुष्पकमल दाहाल ‘प्रचण्ड’ प्रधानमन्त्री बन्ने पनि बताएका छन् । तत्कालीन एमाले र माओवादी केन्द्रबीच पार्टी र सरकारको नेतृत्व संयुक्त रुपमा गर्ने लिखित सम्झौता कार्यान्वयन हुने उनले विश्वास व्यक्त गरेका छन् ।
प्रतिनिधि सभाका लागि गोरखाबाट निर्वाचित सांसद अधिकारीले भने, ‘जिम्मेवार नेताहरुबीचमा लिखित रुपमा भएको सम्झौताको पालना गरे मात्र एकताको मर्मबाेध गरेको ठहर्छ । लिखित सहमति सत्ताको खेल नभई पार्टी एकताको दस्तावेज हो ।’ सहमति विरुद्ध उभिनेहरु एकताविरोधी भएको उनकाे भनाइ छ।
पार्टी एकतापछिको विचारबारे प्रष्ट पार्दै अधिकारीले तत्कालीन जनताको बहुदलीय जनवाद (जबज) र एक्काइसौँ सताब्दी जनवादको ‘ह्याङ’बाट मुक्त हुन समेत नेता र कार्यकर्तालाई आग्रह गरे । उनले भने, ‘माओवादीको हेटौँडा महाधिवेशन र एमालेको नवौँ महाधिवेशनको भावलाई पकडेर जनताको जनवादमा जाने भन्ने पार्टीको आधिकारिक नीति हो । यसले लिएको ‘लाइन’ ध्यान नदिई पूरानै विचारका आधारमा अभिव्यक्ति दिनु ठीक होइन ।’
सांसद अधिकारीले बहुआयामिक राष्ट्रिय गौरवको बुढीगण्डकी परियोजनाको काम अगाडि नबढेकोमा पनि चिन्ता व्यक्त गरेका छन् । ‘स्थानीय जनता आशंकित र आक्रोशित भइरहेका छन्, छिटो काम हुनुपर्यो भनेर दवाब दिइरहेका छन्’ उनले भने, ‘कर्मचारीतन्त्र र राजनीतिका दलालले काम रोकिरहेका छन् ।’
बुढीगण्डकी परियोजना समयमै बनाउन सदनमा समेत माग गर्दै आएको अधिकारीले बताए । सोको लागि आफूले शीर्ष नेताहरुलाई समेत दवाब दिइरहेको र नेकपाका अध्यक्ष प्रचण्डले विशेष चासो दिइरहेको उनले खुलाए । मुआब्जा सम्बन्धि काम गत वर्ष नै सकिनु पर्नेमा कर्मचारीतन्त्र र राजनीतिक दलालका कारण काम अगाडि नबढेको उनको भनाई छ ।
