लाेकपाटी न्यूजकाठमाडौं, १४ जेठ। नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले मिडिया काउन्सिल विधेयक विवादित बनेकाले सबैलाई मान्य हुने गरी परिमार्जन गरेर अघि बढ्ने बताएका छन्।
सोमबार काठमाडौंमा आयोजित एक कार्यक्रममा बोल्दै प्रचण्डले नेकपाको सरकार भएका बेला मिडियामाथि कुनै पनि रुपले अंकुश लगाउने खालको काम नहुने बताएका हुन्। उनले मिडिया विधेयकका विषयमा सरकारसँग र संसदभित्र पनि गम्भिर रुपमा छलफल भइरहेको बताए।
उनले भने, ‘प्रेस काउन्सिल नेपाल र पत्रकार महासंघको तर्फबाट गोविन्द आचार्य समेतको नेतृत्वमा र प्रेस काउन्सिलबाट किशोर श्रेष्ठको नेतृत्वमा एउटा ठूलो टिम मकहाँ आयो। र, हिजो जनयुद्धको बेलामा पार्टी र नेताका विचार र भावनाहरु जनतामा पुर्याउन खेलिएका भूमिका सन्दर्भसमेत स्मरण गर्दै हाम्रै कम्युनिष्ट पार्टी, जसले स्वतन्त्रताको निम्ति सबैभन्दा बढी संर्घष र बलिदान गर्यो त्यसैको नेतृत्वमा सरकार भएको बेलामा मिडिया माथि कुनै न कुनै रुपले अंकुश लगाउने खालको काम नहोस्।’ उनले थपे, ‘यो सरकारले बनाउने मिडिया काउन्सिल अनि मिडिया काउन्सिलले दिने दण्ड सजाय वा नियमनको व्यवस्थाले त्यतातिर लान्छ भनेर उहाँले मलाई गम्भिर रुपले ध्यानाकर्षण गराउनु भएको हो।’
प्रेसमाथि कुनै खालको अंकुश लगाउने मनसाय वा उद्धेश्य नलिएको उनले दाबी गरे। उनले भने, ‘हाम्रो वैचारिक निष्ठा र हाम्रो पक्षधरतालाई पनि कमजोर नपार्ने हिसाबले यो परिमार्जन हुन्छ। यो पारित हुने बेलासम्म जाँदा परिमार्जित भएरै आउँछ।’
सरकारको चिन्ता र पार्टीको चिन्ता धेरै अराजकता भएर फेरि प्रतिक्रियावादीले फाइदा उठाउन नपाओस् भन्ने चिन्ता नै मुख्य चिन्ता रहेको प्रचण्डले बताए। उनले भने, ‘तर, त्यसो गर्दा प्रेस स्वतन्त्रतामाथि कम्युनिष्ट पार्टीले अंकुश लगायो भन्ने भाव चाहिँ कहीँ कतै नआओस् भन्ने कुरामा पनि हामी सर्तक छौं। त्यसकारण तपाईंहरुको चिन्ताबारे हामीले केही पनि गरेका छैनाैं कि भन्ने तथा सरकार संवेदशिल छैनकी भन्ने पनि नपरोस्।’ पत्रकारका जिज्ञासा र चिन्तालाई सम्बोधन गर्नेतिर नै सरकारका छलफलहरु अगाडि बढेको उनको भनाइ छ।
