लाेकपाटी न्यूजबझाङ, १४ वैशाख। नेत्रविक्रम चन्द ‘विप्लव’ समूहबाटआफ्नो नाम हटाउन एक व्यक्तिले जिल्ला प्रहरी कार्यालयमा निवेदन दिएका छन्। विप्लवमा आबद्ध व्यक्तिले सो समूहबाट आफ्नो नाम हटाउन जिल्ला प्रहरी कार्यालय पुगेको प्रहरीले जनाएको हो।
शुक्रबार मात्रै केदारस्युँ गाउँपालिका १ रायलका १९ वर्षीय सन्दीप मल्लले आफू विप्लव समूहमा आवद्ध नभएको भन्दै नाम हटाउन निवेदन दिएको जिल्ला प्रहरी कार्यालयका बझाङका सूचना अधिकारी प्रहरी निरीक्षक नैनबहादुर साउदले जानकारी दिए ।
त्यस्तै दुर्गाथली गाउँपालिका ७ बस्ने २८ वर्षीय सन्तोष दौल्यालले आफू विप्लव समूहमा नरहेको र आगामी दिनमा नरहने प्रतिबद्धतापत्रसहित जिल्ला प्रहरी कार्यालयमा निवेदन पेश गरे । प्रहरीमा निवेदन पेश गरेपछि उनीहरुको नाम अभिलेखबाट हटाइएको प्रहरी निरीक्षक साउदले जानकारी दिए ।
प्रहरीले जिल्लाका उक्त समूहमा आबद्ध हुनेमाथि निगरानी बढाएको छ । पछिल्लो समयमा प्रहरीले जिल्लाको सुरक्षा व्यवस्था निकै कडा पारेको प्रहरी नायब उपरीक्षक सूर्यबहादुर केसीले बताए ।
