लाेकपाटी न्यूज
नेपालगञ्ज, २७ फागुन । राष्ट्रिय प्रजातन्त्र पार्टी (राप्रपा) का अध्यक्ष कमल थापाले सरकार र सिके राउतबीचको सहमति स्वागतयोग्य भएको बताउँदै सिके राउतलाई मूलधारमा ल्याउनु सरकारकाे सफलता भएका बताएका छन् ।
सैद्धान्तिक रुपमै मुलुकको राष्ट्रिय अखण्डता स्वीकार गरेर आउने जो कोहीलाई पनि स्वागत गर्नुपर्ने बताउँदै राप्रपाको मेची–महाकाली राष्ट्रिय स्वाभिमान यात्राका क्रममा आज नेपालगञ्जमा आयोजना गरिएको पत्रकार सम्मेलनमा अध्यक्ष थापाले भने, ‘सरकार र सिके राउतबीच भएको सहमति स्वागतयोग्य छ । तर, सहमतिमा भएका कतिपय अस्पष्टतालाई सरकारले प्रस्ट पार्नुपर्छ ।’
उनले नेत्र विक्रम चन्दले नेतृत्व गरेको माओवादीको हिंसात्मक गतिविधिलाइ इङ्गित गर्दै भने, ‘दमनको नीतिले समाधानमा पुग्न सकिँदैन् । सरकार यस विषयमा गम्भीर हुनैपर्छ ।’ उनले प्रधानमन्त्री केपी शर्मा ओली सबल र सक्षम नेतृत्वकर्ता भए पनि सरकारको मार्गचित्र स्पष्ट नभएकाले जनतामा अन्योलताको अवस्था देखिएको बताएका छन् ।
उनले आफ्नो दलको मेची–महाकाली राष्ट्रिय स्वाभिमान यात्रा कुनै दल विशेषको विरोधमा नभई राष्ट्रिय अखण्डता, स्वतन्त्रता, हिन्दूत्वको रक्षाका लागि भएको पनि बताएका छन् ।
आइतबार नेपालगञ्ज पुगेको स्वाभिमान यात्रा आज दाङका लागि प्रस्थान गरेको छ । चैत १ गते काठमाडौंको भृकुटीमण्डपमा आमसभाको आयोजना गरी यात्राको समापन गरिने बताइएको छ ।
