लाेकपाटी न्यूज
काठमाडौं, १४ फागुन । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी निकट पत्रकार संगठन क्रान्तिकारी पत्रकार संगठनको नाम फेरिएको छ। संगठनको नयाँ नाम जनपत्रकार संगठन नेपाल राखिएको संगठनका केन्द्रीय अध्यक्ष प्रकाश डुम्रेले जानकारी गराए।
मंगलबार रिपोर्टर्स क्लब नेपालमा पत्रकार सम्मेलन गर्दै उक्त संगठनले आफूहरुको संगठनले नाम परिवर्तनको जानकारी दिएको छ। गत पुस ७ र ८ गते बुटवलमा बसेको दोस्रो केन्द्रीय समितिको पूर्ण बैठक र मातृ पार्टीको निर्णयानुसार संगठनको नाम परिवर्तन गरिएको संगठनका अध्यक्ष डुम्रेले जानकारी दिए।
उनले भने, ‘कानूनी र प्राविधिक कारणले गर्दा हामीले संगठनको नाम फेर्नुपरेको हो।’ पछिल्लो समय सरकार पक्षबाट प्रेसविरोधी ऐन कानून निर्माणका श्रृङ्खला बढ्दै गएका बेला संगठनले देशका ४० जिल्लामा मानवअधिकार, प्रेस तथा अभिव्यक्ति स्वतन्त्रताको बहस चलाएको अध्यक्ष डुम्रेले जनाए।
उनले कार्यक्रमलाई निरन्तरता दिने भन्दै प्रेस तथा अभिव्यक्ति स्वतन्त्रताको बहसलाई थप तिब्र पार्ने जनाए। उनले पछिल्लो समय जनपक्षीय पत्रकारिता चुनौतिपूर्ण बनेको भन्दै आम मिडिया र मिडियाकर्मीलाई आफूहरुको अभियानमा साथ दिनसमेत आग्रह गरे। उनले भने, ‘सबै पत्रकारहरुले पछिल्लो विकसित राजनीतिक घट्नाक्रमलाई जिम्मेवार र संयममित भएर कलम नचलाए देशमा अप्ठ्यारो परिस्थिति सिर्जना हुन्छ। यो कुरा सबैले बुझ्न जरुरी छ।’
डुम्रेले पछिल्लो समय नेपाली जनपक्षीय पत्रकारिता जटिल र चूनौतिपूर्ण मोडमा आइपुगेको बताए। उनले भने, ‘नेपाली राजनीतिक आन्दोलनसँगै जनपक्षीय पत्रकारिताको विकास र यसको अगुवाई गर्ने तहमा एकमत नरहँदा यसको विकास र प्रभावकारिमा जटिलता निरन्तर रहिरहे। तर, जनपक्षीय पत्रकारिताको धारणा र दायित्वलाई हाम्रो संगठनले निरन्तर अगाडि बढाइरहेको छ।’
यसअघि क्रान्तिकारी पत्रकार संगठनको नामबाट हुँदै आएका गतिविधि अब जनपत्रकार संगठनको नामबाट हुने महासचिव हिम विष्टले जानकारी दिए। सबै जिल्ला र क्षेत्रीय समन्वय समितिलाई अब जनपत्रकार संगठन, नेपालको नामबाट कार्यक्रम गर्न निर्देशन दिएको पनि महासचिव विष्टले जानकारी दिए ।
कार्यक्रममा हालै एनसेल मूख्यालय अगाडि र देशका विभिन्न ठाउँमा भएका बम विस्फोटबारे पत्रकारले सोधेको एक प्रश्नमा संगठनका अध्यक्ष डुम्रले भने, ‘बम बिस्फोट किन भयो भनेर कारण खोज्नु जरुरी छ। तर पनि ज्यान गुमाउनेप्रति समवेदना।’ एनसेलले राज्यलाई कर तिरेको भए आज यो अवस्था नै नआउने उनले दावी गरे।
