लाेकपाटी न्यूजकाठमाडौं। नेपाल कम्युनिष्ट पार्टीका नेता एवं पूर्व गृहमन्त्री जनार्दन शर्मा ‘प्रभाकर’ले आफू कुनै पदको लोभी नभएको स्पष्ट पारेका छन्।
सोमबार बिहान सामाजिक सञ्जाल फेसबुकमा स्टाटस लेख्दै शर्माले आफूले पद नखोजेको र पद हत्याउने कुनै योजना नरहेको स्पष्ट गरेका हुन् । केही दिनयता मन्त्रीमण्डल फेरबदल हुने र जनार्दन मन्त्री बन्ने लाइनमा रहेको समाचार सार्वजनिक भइरहेका थिए ।
शर्माले पछिल्लो समय सरकारले संघीयताको मर्मबोध गर्न नसकेको र स्थानीय सरकारलाई कमजोर बनाएको बताउँदै आएका छन् । संघीयता भनिए पनि व्यवहारमा केन्द्रमै अधिकार राख्ने र कर्मचारीतन्त्र नै शक्तिशाली बनाउने सरकारी निर्णयको उनले आलोचना गर्दै आएका थिए।
कतिपयले सरकारका कामप्रति शर्मा कडा हुनु पदको बार्गेनिङ हुनसक्ने खालका भ्रामक टिप्पणीसमेत गर्दै आएका थिए । तर, शर्माले आफूले पदका लागि राजनीति नगरेको र जनताको एजेण्डासँग हातेमालो गर्ने स्पष्टिकरण दिएका हुन्। यस्तो छ शर्माको स्टाटस।
‘सङ्घीयता कार्यान्वयनको एजेण्डाप्रति सचेततापूर्वक लागेको कुराबाहेक अन्य पद खोज्दै नहिडेको र योजना नबनाएको स्पष्ट गर्दछु। चासो चिन्ता भएका व्यक्तिहरुले मन्त्री नियुक्ति गर्ने र बर्खास्ती गर्ने सम्बन्धी निकाय वा मेरो नाम प्रयोग गरी समाचार बिकाउन मेहेनत गर्नेहरुसँग सिधै सम्पर्क गर्न अनुरोध गर्दछु ।’
