लाेकपाटी न्यूजकाठमाडौं । नयाँ शक्ति पार्टी नेपालका संयोजक तथा पूर्वप्रधानमन्त्री बाबुराम भट्टराईले ११ वर्ष लामो जनयुद्धको नेतृत्व गरेकोमा आफूलाई सधैं गौरववोध हुने गरेको बताएका छन् ।
पूर्वपश्चिम जनजागरण अभियानको क्रममा बुधबार गृह नगर गोरखाको पालुङटार पुगेका उनले जनयुद्धप्रति गर्व भए पनि मान्छे मारिएकोमा पहिलो पटक क्षमायाचना गरेका हुन् ।
पालुङटार नगरपालिकाका जनप्रतिनिधि तथा बासिन्दासँगको अन्तरक्रियामा भट्टराईले त्याग र बलिदानबाट नै राजतन्त्र हटेर देश संघीय गणतान्त्रिक बनेको बताए।
‘जनयुद्धका शहीद, बेपत्ता परिवारजन, घाइते सबैप्रति म सधैं नतमस्तक रहन्छु,ु भट्टराईले भने, ‘जनयुद्धको राजनीतिक नेतृत्व लिएकोमा मलाई गर्व छ। कैयौं मान्छेको ज्यान गयो त्यसमा दुख छ। मारिनु नपर्ने साथीहरू मारिनुभयो। अत्यन्त दुस्ख छ, म क्षमायाचना गर्न चाहन्छु।’
‘राजनीतिमा पनि त्याग र बलिदान नगरी उपलब्धि प्राप्त नहुने रहेछ’ उनले भने, ‘राजतन्त्र हटाउन जनयुद्ध गरिएको थियो। प्राप्त गरियो, कैयौं कुरा बाँकी छ।’ नयाँ ढंगको क्रान्ति आफूहरूले नयाँ तरिकाबाट जारी राखेको उनले बताए।
