लाेकपाटी न्यूजकाठमाडौं, १ फागुन । खानेपानी मन्त्री बिना मगरले काठमाडौं उपत्यकाबासीले झेल्नु परेको खानेपानीको समस्यालाई सरकारले गम्भीरतापूर्वक हल गर्न खोजिरहेको बताएकी छिन् ।
काठमाडौं उपत्यका खानेपानी लिमिटेड (केयुकेएल) को एघारौं वार्षिकोत्सव समारोहलाई सम्बोधन गर्दै मन्त्री मगरले काठमाडौंबासीले झेल्नुपरेको खानेपानीको समस्या समाधानमा सरकार निकै गम्भीर रहेको बताएकी हुन् ।
उनले मेलम्चीले नयाँ चुनौतिसँग संघर्ष गरिरहेका बताउँदै मेलम्ची आयोजनामा देखिएको समस्या समाधान गर्न सरकार निकै गम्भीर ढङ्गले अघि बढेको बताइन् ।
बार्षिकोत्सव कार्यक्रमलाई सम्बोधन गर्दै उनले भनिन्, “मेलम्चीले नयाँ चुनौतिसँग संघर्ष गरिरहेको छ । मेलम्चीको विषयमा केही अन्यौल देखिएपनि यो सधैं रहँदैन । खानेपानीको सही व्यवस्थापन गर्न केयुकेएल प्रतिबद्ध भएर लाग्नुपर्छ । केयुकेएलको कार्य क्षमताका विषयमा आम जनताले चासोका साथ हेरिरहेका छन् ।”
केयुकेएलको भूमिका र उद्देश्य निकै महत्वपूर्ण रहेको उनको भनाई छ । उनले यस संस्थाको गरिमा बचाई राख्न समेत आग्रह गर्दै मन्त्रालयले केयुकेएललाई सक्षम र मजबुत बनाउन कुनै कसर बाँकी नराख्ने बताइन् ।
कार्यक्रममा कीर्तिपुर नगरपालिकाका नगर प्रमुख रमेश महर्जनले केयुकेएलबाट जनताले धेरै आशा राखेको भन्दै केयुकेएललाई काकाकुल कम्पनी नबनाउन आग्रह गरे । केयुकेएलको भूमिका बढ्दै गएकाले बताउँदै यसलाई अझै सुधार गरेर लैजानुपर्ने मन्त्रालयका सहसचिव तेजराज भट्टको भनाई छ ।
कार्यक्रममा मन्त्री मगरले केयुकेएलमा कार्यरत उत्कृष्ट कर्मचारीहरु र अवकाश पाएका कर्मचारीहरुलाई सम्मान समेत गरेकी थिइन् ।
