लाेकपाटी न्यूजस्याङ्जा । भूमि व्यवस्था, सहकारी तथा गरिबी निवारण मन्त्री पद्मा अर्यालले चुनावको बेलामा आफूहरूले जनताको हात–हातमा थमाएको घोषणापत्रलाई नभुलेको बताएकी छिन् ।
बिहीबार स्याङ्जाको गल्याङ नगरपालिकाको जगत्रादेवी साना किसानको छैठौं साधारण सभालाई सम्बोधन गर्दै मन्त्री अर्यालले भनिन्, ‘हामी चुनावको बेलामा तपाईंहरूलाई दिएको घोषणापत्र र हाम्रो प्रतिबद्धता भुलेका छैनौं, चुनावी घोषणापत्रअनुसार नै हामीले काम गरिरहेका छौं । तर, धैर्य रहनुस्, केही समय लाग्छ ।’
अर्यालले कुनै पनि कामको सम्मान नगरेसम्म देश नबन्ने पनि बताइन् । ‘हाम्रा दाजुभाइ विदेशमा गर्ने काम नेपालमै गर्न लाज मान्नुहुन्छ, कामलाई ठूलो सानो ठान्ने हाम्रो प्रवृत्ति छ, जबसम्म कामको सम्मान हुँदैन, तबसम्म देश बन्दैन’ अर्यालले भनिन् ।
मन्त्री अर्यालले सरकारले समृद्धिको आधारका रुपमा सहकारीलाई लिएको भन्दै प्रत्येक घरबाट १ जना सहकारीमा जोडिन र उत्पादनमूलक काममा लाग्न आग्रह समेत गरिन् । ‘सरकारले सहकारीलाई समृद्धिको आधारको रूपमा लिएको छ’ उनले भनिन्, ‘प्रत्येक घरबाट एकजना सहकारीमा जोडिएर उत्पादनमूलक काममा लाग्नुपर्छ । प्रत्येक वडामा सहकारी बनाउने र युवा लक्षित कार्यक्रम ल्याउने तयारी गरेको छु ।’
मन्त्री अर्यालले सहकारीबाट उत्पादन भएका सामानलाई संकलन केन्द्र बनाउने योजनामा आफूहरू रहेको जानकारी पनि गराइन् । ‘सहकारीबाट उत्पादन भएका सामानलाई संकलन केन्द्र बनाउने हाम्रो योजना छ’ उनले भनिन्, ‘सामानको मुल्य सिधै किसानले पाउनुहुन्छ, संकलन केन्द्रको अध्ययन भइरहेको छ । आगामी वर्षसम्ममा लागू गर्ने हाम्रो उद्देश्य छ ।’
शिक्षा, स्वास्थ्यमा जनताको जीवनस्तर उकास्ने तरिकाले सरकार लागिरहेको अर्यालले बताइन् । ‘जनताको जीवनस्तर उकास्नका लागि यसै वर्षबाट स्याङ्जामा राष्ट्रिय परिचयपत्र दिन्छौं’ अर्यालले घोषणा गरिन् । आगामी बजेटले परिवर्तनका लहरहरू आउने र सरकारले अझै जनताको मन जित्ने उनले बताइन् ।
‘जनताको जीवन बदल्छौं’
स्याङ्जाको वीरेन्द्र माध्यमिक विद्यालयको ५७ औं वार्षिकोत्सबलाई सम्बोधन गर्दै मन्त्री अर्यालले परिवर्तनको अनुभूति हुने गरी काम गर्ने बताइन् । अर्यालले भनिन्, ‘हामी समृद्धिको दिशामा छौं, सरकार जनताको इच्छा आकाक्षा पूरा गर्न अहिले योजनाबद्द तरिकाले लागिरहेको छ, सरकारमा रहनुभएका मन्त्रीहरू प्रतिबद्ध हुनुहुन्छ, म प्रतिबद्ध छु । जनताले देख्नेगरि काम हुन्छ ।’
हामीले शिक्षालाई संविधानमै लेखेका छौं, ‘अर्यालले भनिन्, ‘शिक्षालाई अझै गुणस्तर र जीवनोपयोगी बनाउन सरकारले चरणबद्ध रूपमा कार्यक्रम ल्याउँदैछ । हामीले शिक्षा क्षेत्रमा आमूल परिवर्तन ल्याउनुछ, सरकारले आगामि २ वर्षभित्रमा सबैलाई साक्षर बनाउने भनेको छ । त्यसैले शिक्षामा देखिएको अहिलेको विकृतिलाई हामीले अन्त्य र्गर्नुपर्छ ।’
हामीले जमिनको वर्गीकरण गरेर जान्छौं, ‘मन्त्री अर्यालले थपिन्, ‘जमिनलाई राम्रोसँग व्यवस्थापन गर्ने योजनामा सरकार छ । विदेशमा रहेका नेपालीलाई स्वदेश फर्काउने वातावरण जमिनको उचित प्रयोगबाट हुन्छ, रोजगारीको वातावरण बन्छ । व्यक्तिको सम्पत्ति राष्ट्रियकरण गर्ने भनेको होइन, आफूले गर्न नसकेको जग्गा भाडामा दिनु भनेको हो। त्यसबाट व्यक्तिलाई नै फाइदा पुग्ने हो ।’
