लाेकपाटी न्यूजकाठमाडौं, २० जेठ। नेपाल कम्युनिस्ट पार्टी अर्थात् विप्लव समूहका कार्यकर्ताले सोलुखुम्बुमा रहेको प्रहरी चौकीमा आक्रमणको प्रयास भन्ने समाचार झुटो भएको प्रमूख जिल्ला अधिकारी नरेन्द्रकुमार रानाले बताएका छन्।
सोलुखुम्बुका महाकुलुङ गाउँपालिका–३, छेस्काममा गए राति विप्लव कार्यकर्ताले चौकी कब्जा गर्ने उद्देश्यसहित आक्रमणको प्रयास गरेको भन्ने समाचार बाहिर आएकोप्रति उनले आश्चर्य प्रकट गरे। रानाले समाचार झुटो भएको दावी गरेका छन्। प्रजिअ रानाले विभिन्न मिडियामा आएको विप्लवका कार्यकर्ताले प्रहरी चौकीमा आक्रमणको प्रयास गरेको भन्नेबारे समाचार झुठो र गलत भएको बताएका छन्।
प्रजिअ रानाले भनेका छन्, ‘प्रहरी चौकीमा आक्रमणको प्रयास भएको छैन, गलत र झुटो समाचार मिडियामा आइरहेका छन्। कोही पनि भ्रममा नपर्नुहोला। प्रजिअ रानाले थपे, ‘चौकी आक्रमणको प्रयास भएको भनेर गाउँमा कसले हल्ला गरिदियो। त्यही हल्लाको भरमा मिडियाले समाचार बनाइदिए।
यता विद्रोही नेकपाका प्रवक्ता खड्गबहादुर विश्वकर्माले पनि प्रहरी चौकी आक्रमणको प्रयास शीर्षकमा आएको समाचार झुटो भएको दावी गरेका छन्। तर, प्रजिअ रानाले प्रहरीको मनोबल बढाउन र विप्लवका प्रवक्ता प्रकाण्डले आफ्नो योजना असफल भएको सन्देश नजाओस् भन्ने मनसायले समाचारको खण्डन गरेको हुनसक्ने आंकलन गरिएको छ।
