लोकपाटी न्यूजकाठमाडौं। जनता समाजवादी पार्टी, नेपालका अध्यक्ष उपेन्द्र यादवले देशमा गरिबी र बेरोजगारीको दर बढ्नुको जिम्मेवारी काँग्रेस र कम्युनिष्टले लिनुपर्ने बताएका छन्।सोमबार वीरगञ्जमा आयोजित एक कार्यक्रममा बोल्दै अध्यक्ष यादवले बेरोजगारी बढ्नुमा नेपाली काँग्रेस र कम्युनिष्ट पार्टीको हात रहेको आरोप लगाएका हुन्।
उनले पढेलेखेका युवालाई देशमा कुनै रोजगारीको लागि स्थान नहुने अवस्था सरकारको नेतृत्वमा बस्ने दलहरुकै कारण भएको बताए। उनले युवाहरु मलेसिया, कतार, अरब जस्ता मुलुकमा रोजगारीको लागि गइरहेको तर देशमा अझै रोजगारी वृद्धिमा चासो नदिइएको बताए। उनले मधेश आन्दोलनको परिणामले नै नेपाल संघीय गणतन्त्र भएको जिकीर गरे। उनले काँग्रेस र कम्युनिष्टका धेरै नेताहरु भ्रष्टाचारमा जोडिएको आरोप समेत लगाए।
