लाेकपाटी न्यूजरोम, ८ फागुन । कृषि तथा पशुपन्छी विकास राज्य मन्त्री राम कुमारी चौधरी नेतृत्वको टोली र विश्व खाद्य कार्यक्रमका उप कार्यकारी निर्देशक अमीर महम्म अब्दुलाहबीच भेटवार्ता भएको छ ।
इटाली रोम स्थित विश्व खाद्य कार्यक्रमको केन्द्रिय कार्यलयमा भएको भेटवर्तामा मन्त्री चौधरीले ‘डब्लु एफ पी’ले नेपाल सरकारसँग गरी रहेको सहकार्य उल्लेखनीय रहेको बताइन् ।
खास गरी नेपालमा स्कुले बच्चाहरुको खाना ,बच्चा र आमाको स्वास्थ ,सिचाइ ,खाद्य सुरक्षा ,भुकम्पपीडित र बाढीपीडितहरुलाई गरेको सहयोग मनन योग्य रहेको उनको भनाइ छ । उनले इटलीबाट थप सहयोगको अपेक्षा राखेको पनि बताइन् । निर्देशक अब्दुल्लाहले नेपाललाई सहयोग र सहकार्य गर्ने प्रतिबद्धता जनाएका छन् ।
उक्त भेटवार्तामा कृषि तथा पशुपन्छी विकास क्षेत्रमा नेपालसँग मिलेर थप कार्यक्रम सञ्चालन गर्ने तथा हाल सञ्चालन रहेको खाद्य अनुगमन प्रणालीलाई स्थानीय सरकार र प्रदेश सरकारसम्म सफल रुपमा कार्यन्वयन गर्न सहयोग गर्ने विषयमा छलफल भएको थियो ।
सोहि अवसरमा एसिया क्षेत्रीय विश्व खाद्य कार्यक्रमका प्रमुख डेभिड काटरुडले नेपाललाई नजिकबाट नियालेको बताउँदै नेपालका लागि ५ वर्षे योजना बनाएर अगाडी बढ्ने बताए ।
निर्देशक अब्दुल्लाहले गत नोभेम्बरमा नेपाल सरकारको तर्फबाट अर्थ मन्त्री डा. युवराज खतिवडाको भ्रमणले कृषि क्षेत्रको विकासमा जोड दिएको बताए । साथै उनले छिट्टै नेपाल भ्रमण गर्ने प्रतिवद्धता जनाए ।
