लोकपाटी न्यूजबुटवल। नेकपा एमाले नेता शंकर पोखरेललाई लुम्बिनी प्रदेशको मुख्यमन्त्री नियुक्त गरेको विरोधमा विपक्षीले प्रदेश प्रमुखको कार्यालय घेरेका छन्। बहुमतबिना एमाले संसदीय दलका नेता पोखरेललाई पुनःमुख्यमन्त्री नियुक्त गरेपछि नेपाली कांग्रेस, माओवादी, जसपा र राजमोसहितको गठबन्धले प्रदेश प्रमुखको कार्यालय परिसरमा धर्ना दिएको हुन्।
उनको शपथ रोक्ने मागसहित ती दलका सांसदहरु धर्नामा बसेका हुन्। कांग्रेस प्रमुख सचेतक फकरुदीन खानले सत्ता र शक्तिको दुरुपयोग गरी एकतर्फी मुख्यमन्त्रीको नियुक्ति गरेकाले नियुक्ति बदर र शपथ रोक्न धर्नामा बसेको बताए। लुम्बिनी प्रदेश सभाका चार विपक्षी दलले आइतबार दिउँसो एक बजे बहुमत प्रदेशसभा सदस्य आफूमा रहेको मौखिक जानकारी गराउँदै ४ बजेसम्म लिखित हस्ताक्षर लिएर आउने बताएका थिए।
दिउँसो ४ बजे ४२ जना सांसदको हस्ताक्षर लिएर गठबन्दन पुग्दा प्रदेश प्रमुखले एमाले नेता शंकर पोखरेललाई पुनः मुख्यमन्त्री नियुक्त गरेका थिए। मुख्यमन्त्रीको राजीनामापछि एमाले संसदीय दलका नेता पोखरेलले संविधानको धारा १६८ को १ बमोजिम बहुमतको एकल सरकार बनाउन बहुमत सदस्यको हस्ताक्षरसहितको निवेदन पेस गरेका थिए। सोही निवेदनका आधारमा प्रदेश प्रमुख धर्मनाथ यादवले मुख्यमन्त्री नियुक्त गरेका थिए।
कांग्रेस माओवादी गठबन्धनले भने एमालेमा ४१ सदस्य नरहेकाले संविधानको धारा १६८ को १ बमोजिम सरकार गठन हुन नसक्ने भएकाले मुख्यमन्त्रीको नियुक्ति संविधान विपरीत भएको दाबी गरेको छ। नेकपाबाट चुनाव लडेकी तर एमालेमा संलग्न भनिएकी विमला कुमारी खत्रीले आफूले माओवादी रोजेको बताएकी छन्।
उनी दाङको निर्वाचन क्षेत्र ३ को ख की सदस्य थिइन्। यस्तै कपिलवस्तुको २ (१) का दृगनारायण पाण्डेले प्रदेश सभा सदस्यबाट राजीनामा दिएका छन्। यस्तै स्वतन्त्रबाट उम्मेदवार बनेका धर्मलालप्रसाद श्रीवास्तव र अजय शाहीले माओवादी गठबन्धनलाई सघाउने बताइसकेको गठबन्धनको दाबी छ।
