लोकपाटी न्यूजकाठमाडौं। प्रतिनिधिसभा विघटनविरुद्ध नेकपा (प्रचण्ड-नेपाल समूह) निरन्तर विरोधमा छ। यसै क्रममा आजै प्रचण्ड-माधव समूहले देशव्यापी रूपमा दोस्रो चरणको आन्दोलनका कार्यक्रम घोषणा गर्दैै छ।
प्रचण्ड-माधव समूहले संघर्ष समितिको बैठक बिहान ११ बजे बोलाएको छ। जसले सम्भव भएसम्म अन्य दलहरूसँग सहकार्य गरेर / नभए एक्लै संघर्षमा उत्रिने निर्णय गर्नेछ।
अन्य दलहरूसँग संयुक्त रूपमा संघर्षका कार्यक्रम गर्ने विषयमा बुधबार केही दलसँग छलफल गरेको भए पनि कुनै सहमति नबनेपछि नेकपा प्रचण्ड-नेपाल समूह एक्लै भए पनि दोस्रो चरणको आन्दोलनमा जाने बताइएको छ। यस समूहले प्रवक्ता नारायणकाजी श्रेष्ठको नेतृत्वमा संघर्ष समिति बनाएको छ। दिउँसो ३ बजे पत्रकार सम्मेलनमार्फत आन्दोलनका कार्यक्रम सार्वजनिक गर्ने तयारी रहेको बुझिएको छ।
आन्दोलन परिचालन गर्न नेकपाले प्रवक्ता नारायणकाजी श्रेष्ठको नेतृत्वमा समिति गठन गरेको छ। श्रेष्ठले शनिबार समितिको बैठक बस्ने र तीन बजे पत्रकार सम्मेलनमार्फत आन्दोलनका कार्यक्रम सार्वजनिक गरिने बताए। आन्दोलनका कार्यक्रम वडादेखि पालिकासम्म र प्रदेशदेखि केन्द्रसम्म जनपरिचालन हुने गरी घोषणा हुने आन्दोलन परिचालन समितिका सदस्यहरुको भनाइ छ।
दाहाल-नेपाल समूहले संसद पुनर्स्थापना नभएसम्म आन्दोलन जारी राख्ने बताएको छ। यो समूहले संघर्षका लागि प्रदेश र जिल्लास्तरमा पनि समिति गठन सुरु गरेको छ। संविधान र लोकतन्त्र विरोधीलाई असफल गर्न संघर्षको विकल्प नरहेको प्रवक्ता श्रेष्ठको भनाइ छ।
दाहाल-नेपाल समूहले असंवैधानिक र अलोकतान्त्रिक, किदमका विरुद्ध राजनीतिक र कानुनी संघर्षको घोषणा गर्दै प्रमुख प्रतिपक्ष लगायत संसद्मा र बाहिरका पार्टीहरुलाई एकताबद्ध भएर अगाडि बढन् अपिल गरिसकेको छ। संसद विघटनसँगै नेकपा विभाजित भएको थियो। वैधानिकतालाई लिएर दुवै पक्ष निर्वाचन आयोगमा पुगेका छन्। संसद विघटनसम्बन्धी मुद्दा सर्वोच्चमा विचाराधीन छ।
